ہے حقیقت عذاب رہنے دو
ٹوٹ جائے گا خواب رہنے دو
کب سزاوار ہوں عنایت کا
یونہی زیرِ عتاب رہنے دو
تم جلا دو کتابِ ہستی کو
اک محبت کا باب رہنے دو
بے خودی میں سوال کر بیٹھا
چپ رہو، لاجواب رہنے دو
اب اتارو زمیں پہ چاند کوئی
یا انہیں بے نقاب رہنے دو
لوگ رکھے ہیں اب نظر ہم پر
فرشتو تم حساب رہنے دو
دیکھ بیٹھا ہوں پارساؤں کو
ہم کو یونہی خراب رہنے دو

مر نہ جائیں کہیں سکوں سے ہم
دل میں کچھ اضطراب رہنے دو
دل، جگر، جان آپ ہیں ابرک
سب ہیں باتیں جناب رہنے دو